Skip to Content

Tuesday, December 10th, 2019

保安費用飽私囊 航空公司搵客笨

Closed
by November 19, 2016 General

話說機管局現時向香港機場離境旅客徵收四十五元機場旅客保安費,由航空公司代收,點知旅客喺透過旅行社購買機票嘅同時,包括國泰及港龍在內嘅幾十間航空公司靜雞雞齊頭收五十大元。小數怕長計,家陣九成本港出發航班機票由旅行社代訂,每年講緊五百萬張機票,一年二千幾萬元,十年二億幾三億元,都咪話唔和味。

聽吓業界人士點講喇。原來國際航空協會為會員航空公司訂立收費機制,機票銀碼以十元為單位,航空公司將旅客保安費連同機票價格一齊計算,於是咪神不知鬼不覺收多咗囉。查實呢個情況已經唔係一朝一夕,之前因為旅行社唔敢得失航空公司冇出聲,如果唔係消費者愈來愈精明,多咗人查詢,到依家都仲可能臭屎密冚。

廣告都有賣喇,今時今日咁嘅服務態度點得o架,作為旅客,唔係話肉赤嗰十元八塊,而係覺得你航空公司當旅客水魚咁(手禁),予取予攜,條氣戳住吖嘛。好似國泰咁吖,被旅客問到點解計多五蚊,一時賴美元折番港紙有差額,一時又話國際航空協會嘅收費機制要收十元整數,實情就係收多咗嘅唔會交番畀機管局,唔怪得畀人鬧爆「好鬼祟,擺明搵笨」。當然喇,講到國泰啲搵笨嘢咯喎,三日三夜都數唔完,淨係超賣機票搞到旅客行程大失預算,已經神憎鬼厭喇。

唔理點都好,旅行社商會已經向機管局同消委會投訴,要求航空公司實價實收,多咗嘅退番畀客,唔該有關方面認真跟進,千祈咪關人個關吖!

係嘞,講咗半日,到底「旅客保安費」係乜東東呢?原來自從「九一一」恐襲之後,機管局為加強機場保安,○二年起向離境旅客徵收費用,由最初廿六元加到依家四十五元。收錢就爽手咯,機場保安咁多年嚟都係漏洞百出,帶刀客自出自入禁區等亂象不絕如縷,冇爆大鑊算係好彩。再講吖,出入香港機場,安全風險點止恐襲咁簡單,淨係嗰個又貴又廢嘅新空管系統已經嚇死人,居然夠膽死飛機起飛後喺畫面消失,仲有冇再離譜啲呀!

枉香港仲成日自詡係國際航空樞紐,要服務冇服務,要安全冇安全,簡直笑大人個口。早排有機構評點全球最佳機場,香港跌出十大,被榜首嘅新加坡拋離九條街,家陣知點解喇!

Previous
Next