Skip to Content

Wednesday, September 18th, 2019

外傭抹窗惹爭議 港府切勿袖手觀

Closed
by October 14, 2016 General

話說菲律賓總領事館本月初突然單方面通知本港菲傭中介公司,話將會喺菲傭合約裏面加入「為安全理由,清潔外窗不屬家傭的職責範圍」條款。本來新措施今日起實施,但消息傳出後僱主當堂鬧爆,有團體甚至發起一人一信向特首表達不滿,目前至少逾千人響應。群情洶湧下,勞工及福利局局長張建宗尋日終於蒲頭,話會向菲方了解情況,而菲律賓駐港總領事館就話會暫緩一個月,至下月十四號至實施。

又難怪僱主咁(興)嘅。正如有人話齋,菲方事前完全冇諮詢僱主,失驚無神推出新規定,今日話抹窗危險唔做,聽日可以話爐火危險唔煲茶,後日又可以話五公斤米太重唔拎,再咁落去容乜易天下大亂?有僱主團體就講得啱嘞,抹窗係家傭嘅基本工作,如果僱主自己做埋,咁請外傭嚟做乜?

話時話,香港地請外傭有時都幾講運氣,請着個盡責嘅固然還得神落,萬一撞正個鍾意喺屋企玩自拍沖涼,又或者有咗身紀,炒佢又唔得,叫佢做粗重嘢又唔得,嗰種無奈真係不足為外人道。當然喇,站喺勞工權益嘅角度,抹外窗又的確係「高危動作」,耐唔耐就傳出「空中飛人」慘劇,加強保障都無可厚非嘅。

至於菲律賓點解唔早唔遲,偏偏喺呢個時候提起外傭抹窗爭議?有人話係因為總統迪泰特競選期間大打「外傭牌」,承諾增加對海外傭工支援,依家正正係兌現承諾嘅時候喎。係真係假就唔知,功夫茶淨係知香港地聘請外傭嘅家庭數以十萬計,今次爭議影響深遠,而其他傭工輸出國亦金睛火眼(目及)到實,一旦形成「案例」,各地爭相效法,僱主肯定有排頭痕!

家陣乜都假,最緊要係港產官僚打醒十二分精神,趁呢個月緩衝期同菲方四四六六拆掂佢。咪話功夫茶又搵新加坡嚟比,當地同樣面對外傭抹窗安全問題,最後政府積極介入調停,多管齊下,包括訂立安全指引,規定外傭抹外窗時要有成年人在旁,同時窗口必須加裝窗花,又強制外傭受聘前接受安全培訓課程,結果成功解決爭議,勞資雙方皆大歡喜。所以話,好多嘢其實事在人為,睇吓官老爺有冇心肝同能力嘅啫。

正如廣告口號話齋,市民請外傭都係想「安心聘用,融入家中」啫,冇理由咁都係奢望啩?

Previous
Next